З 04 па 09 красавіка 2022 года ў ДУА “Конькаўскі вучэбна-педагагічны комплекс дзіцячы сад-сярэдняя школа” быў праведзены тыдзень пачатковых класаў “Вучымся гуляючы”. Вучыцца павінна быць заўсёды цікава. У гэтым цвёрда ўпэўнены настаўнікі пачатковай школы.
Тыдзень пачатковых класаў быў праведзены з мэтай актывізацыі пазнавальнай цікавасці вучняў да вучэбных прадметаў, развіцця творчых і інтэлектуальных здольнасцей дзяцей. Папярэдне была спланавана работа, складзен план тыдня, вызначана тэматыка, а таксама формы правядзення мерапрыемстваў. На пазакласныхзанятках былі выкарыстаны розныя формы работы: віктарыны, гульні, конкурсы і г. д.
Першы дзень праходзіў пад назвай “Знай і любі свой родны край!” і быў, прысвечаны Году гістарычнай памяці. Пачаткоўцы пабывалі ў школьным краязнаўчым музеі, дзе настаўнік гісторыі Страмавус В.І. правяла цікавую і змястоўную экскурсію. А таксама вучні падзяліліся сваімі ўражаннямі аб наведванні падчас канікул маёнтка Бохвіцаў ў вёсцы Флер’янова. Конкурс малюнкаў “Люблю мой край - старонку гэту!” выклікаў у дзяцей вялікую цікавасць: удзел у ім прынялі ўсе без выключэння.
Актыўнасць, кемлівасць, эрудыцыю дзеці праявілі пры правядзенні гульні “Знаўцы беларускай мовы”, якая праходзіла ў другі дзень тыдня. Цікава прайшоў конкурс чытальнікаў “Гучы, родная мова!”. Навучэнцы праявілі сцэнічны талент, чытаючы вершы на роднай мове. Журы абрала самых лепшых чытальнікаў.
У вясёлай сяброўскай атмасферы праходзіла гульня “Падарожжа ў краіну Матэматыкі”. Дзень “З матэматыкай сябрую і ніколі не сумую” завяршыўся абраннем лепшага матэматыка пачатковай школы.
7 красавіка вучні пачатковых класаў удзельнічалі ў спартыўным свяце ”Будучыя чэмпіёны маёй Айчыны”, якое было прысвечана Міжнароднаму дню здароўя. Гэта было яркае свята радасці, задавальнення і поспеху.
Дзень “Зберажом прыроду для сваіх нашчадкаў” пачаўся праглядам прэзентацыі “Будзь прыродзе сябрам”, затым пачаткоўцы прынялі ўдзел у экалагічнай акцыі “Зробім свет чысцейшым!”.
Вучні, якія прынялі найбольш актыўны ўдзел у тыдні пачатковых класаў, праявілі сябе ў конкурсах, былі ўзнагароджаны граматамі. Тыдзень атрымаўся насычаным і займальным. Спадзяёмся, у вучняў зменіцца стаўленне да вучобы, з’явіцца зацікаўленасць у пазнанні новага, павысіцца цікавасць да працэсу навучання. Тыдзень пачатковых класаў дазволіў дзецям раскрыць творчы патэнцыял, даў вялікі эмацыянальны зарад.
Кіраўнік метадычнага аб’яднання
настаўнікаў пачатковых класаў
Марчык Т.М.